-1- Móse kallaði saman allan Ísrael og sagði við þá:Heyr þú, Ísrael, lög þau og ákvæði, sem ég birti yður í dag. Lærið þau og varðveitið þau, svo að þér haldið þau.

Drottinn Guð vor gjörði við oss sáttmála á Hóreb.

-3- Ekki gjörði Drottinn þennan sáttmála við feður vora, heldur við oss, oss sem hér erum allir lifandi í dag.( sjá 2 Mós.20:1-17 )

-4- Drottinn talaði við yður á fjallinu augliti til auglitis út úr eldinum.

-5- Ég stóð þá á milli Drottins og yðar til þess að flytja yður orð Drottins, því að þér hræddust eldinn og fóruð ekki upp á fjallið.

Hann sagði:

-6- Ég er Drottinn, Guð þinn, sem leiddi þig út af Egyptalandi, út úr þrælahúsinu.

I

-7- Þú skalt ekki hafa aðra guði en mig.

II

-8- Þú skalt engar líkneskjur gjöra þér, engar myndir eftir því, sem er á himnum uppi, eða því, sem er á jörðu niðri, eða því, sem er í vötnunum undir jörðinni.

-9- Þú skalt ekki tilbiðja þær og ekki dýrka þær, því að ég, Drottinn Guð þinn, er vandlátur Guð, sem vitja misgjörða feðranna á börnunum, og í þriðja og fjórða lið, þeirra sem mig hata,

-10- en auðsýni miskunn þúsundum, þeirra sem elska mig

og varðveita boðorð mín.

III

-11- Þú skalt ekki leggja nafn Drottins Guðs þíns við hégóma, því að Drottinn mun ekki láta þeim óhegnt, sem leggur nafn hans við hégóma.

IV

12- Gættu þess að halda hvíldardaginn heilagan, eins og Drottinn Guð þinn hefir boðið þér.

-13- Sex daga skalt þú erfiða og vinna allt þitt verk,

-14- en sjöundi dagurinn er hvíldardagur helgaður Drottni Guði þínum. Þá skalt þú ekkert verk vinna og ekki sonur þinn eða dóttir þín, þræll þinn eða ambátt þín, uxi þinn eða asni eða nokkur skepna, eða útlendingur, sem hjá þér er innan þinna borgarhliða, svo að þræll þinn og ambátt þín

geti hvílt sig eins og þú.

-15- Og minnstu þess, að þú varst þræll á Egyptalandi og að Drottinn Guð þinn leiddi þig út þaðan með sterkri hendi og útréttum armlegg.

Þess vegna bauð Drottinn Guð þinn þér að halda hvíldardaginn.

V

-16- Heiðra föður þinn og móður þína, eins og Drottinn Guð þinn hefir boðið þér, svo að þú verðir langlífur og svo að þér vegni vel í því landi, sem Drottinn Guð þinn gefur þér.

VI

-17- Þú skalt ekki morð fremja.

VII

-18- Þú skalt ekki drýgja hór.

VIII

-19- Þú skalt ekki stela.

IX

-20- Þú skalt ekki bera falsvitni gegn náunga þínum.

X

-21- Þú skalt ekki girnast konu náunga þíns, og ekki ágirnast hús náunga þíns, ekki land hans, ekki þræl hans eða ambátt, ekki uxa hans eða asna, né nokkuð það, sem náungi þinn á.