Sæll er sá maður,
er eigi fer að ráðum óguðlegra,
eigi gengur á vegi syndaranna
og eigi situr í hópi þeirra,
er hafa Guð að háði,
heldur hefir yndi af lögmáli Drottins
og hugleiðir lögmál hans dag og nótt.
Hann er sem tré,
gróðursett hjá rennandi lækjum,
er ber ávöxt sinn á réttum tíma,
og blöð þess visna ekki.
Allt er hann gjörir lánast honum.
Svo fer eigi hinum óguðlega,
heldur sem sáðum, er vindur feykir.
Þess vegna munu hinir óguðlegu eigi standast í dóminum
og syndugir eigi í söfnuði réttlátra.
Því að Drottinn þekkir veg réttlátra,
en vegur óguðlegra endar í vegleysu.
